Межы Іншага

Межы Іншага – калектыўны выставачны праект групы Вера, які быў прэзентаваны ў жніўні 2016 у галерэі ЦЭХ у Менску. Асновай для працы над гэтай выставай сталі ўяўленні пра беларускую талерантнасць, якія праходзілі праверку ў тыя дні. Сфарміраваныя на аснове гістарычнай мультыкультурнасці, падмацаванай стагоддзямі мірнага суіснавання розных дыяспар, ці былі яны актуальныя на той час ці былі толькі культурным стэрэатыпам, на які доўгі час не было магчымасці паглядзець крытычна праз адсутнасць судачыненняў з Іншым?

 

Рыхтуючы выставу, група імкнулася працаваць з лакальным кантэкстам, уздымаць найбольш актуальныя пытанні, супастаўляць іх з тымі, якія ставяцца ў агульнаеўрапейскім і глабальным кантэкстах. У аснове працы ляжаў перадусім аналіз плыні медыйнай інфармацыі, аналіз дакументаў і статыстыкі, а таксама асабістых сітуацый.

 

Выстава была праектам групы Вера, якая сфарміравалася ў чэрвені 2016-га і аб’яднала мастакоў і культурных работнікаў Веру Залуцкую, Аляксея Навумчыка, Антона Сарокіна і Аляксея Талстова.