Што нас аб’ядноўвае?

Сёньняшні сьвет падаецца ўсё больш разасобленым нягледзячы на тыя працэсы глабалізацыі, якія яго фармуюць. Традыцыйны лад жыцьця перайначваецца тэхналогіямі камунікацыі і магчымасьцямі транскультурнага ўзаемадзеяньня. Сучасныя грамадствы імкнуцца да неаднастайнасьці, мультыкультуральнасьць паўстае выклікам, які патрабуе належнага асэнсаваньня.

 

Адказам на пастаўленае вышэй пытаньне можа быць хіба гуманізм. Толькі ўніверсальныя каштоўнасьці, узаемапавага і ўзаемападтрымка могуць быць альтэрнатывай праваму папулізму, які мы можам назіраць сёньня ва многіх краінах. Нацыяналізм і кансэрватызм занадта простыя і нестабільныя прытулкі ў сітуацыі, калі межаў робіцца ўсё меней, а магчымасьцяў для іх пераадоленьня ўсё болей.

 

Вымушаная міграцыя ўзьнікае тады, калі выбару няма, калі існуе небясьпека. Таму стаўленьне да ўцекачоў ёсьць ня толькі палітычным пытаньнем, але і пытаньнем этыкі, выпрабаваньнем для чалавечнасьці.

 

Бежанцы з Чачні – не навіна для Берасьця, але сітуацыя, якая расьцягнулася на дзесяцігоддзі і пасьпела абрасьці сваёй міфалогіяй. Лёгка знайсьці праблему ў прадстаўніках іншай культуры, але таксама лёгка зразумець, што ніякая сям’я па сваёй волі ня вырашыцца на пераезд у невядомасьць. Ніякія бацькі не пазбавяць сваіх дзяцей школы і сяброў, звычайнага камфорту. Дзеля гэтага патрэбныя прычыны. Нажаль, людзям даводзіцца пакідаць свой дом у пошуках новага, у пошуках паратунку. Самае меншае, што можна зрабіць у зьвязку з гэтым, папросту ўзгадаць, што акрамя культуры, традыцый і рэлігіі ёсьць нешта большае, агульнае для ўсіх нас.

 

На выставе “Што нас аб’ядноўвае?” прадстаўленыя фатаграфіі Сяргея Лескеця і Аксаны Юшко. Сяргей – беларускі фатограф, вядомы сваімі фотаздымкамі рэгіянальнай Беларусі, мястэчак і вёсак. Аўтар стварае партрэт найбольш традыцыйнай і аўтэнтычнай часткі нашай культуры, далёкай ад сучаснага рытму вялікіх гарадоў. Разам з тым на гэтых фотаздымках мы таксама можам назіраць праявы часу, заўважаць тыя перамены, якія прыходзяць у правінцыю. На выставе дэманструюцца працы з сэрыі “AGRO”, а таксама выбраныя здымкі, зробленыя для медыя.

 

Фатаграфіі з Чачні Аксаны Юшко зьяўляюцца часткай калектыўнага праекта “Грозны: Дзевяць гарадоў”, які налічвае мноства матэрыялаў, зробленых падчас розных паездак у Чачню цягам дзесяці апошніх гадоў. Працы расказваюць пра жыцьцё, культуру і побыт чачэнскага народу, паказваюць той бок, які не заўжды добра асьветлены ў медыя. У сваіх фота Аксана падкрэсьлівае ня толькі характэрныя для мясцовай традыцыі асаблівасьці, аднак і ўдала перадае тое наднацыянальнае вымярэньне, уласьцівае ўсім людзям без выключэньня.

 

Выстава створаная ў межах супрацы з праваабарончай установай Human Constanta.

 

Аляксей Талстоў, куратар